ललितपुर -राष्ट्रिय प्रजातन्त्र पार्टी ( राप्रपा )बाट ललितपुर क्षेत्र नं. १ मा प्रतिनिधिसभा सदस्य पदका लागि सजिना कार्कीले उम्मेदवारी घोषणा गर्दै आफ्नो चुनावी एजेन्डा सार्वजनिक गरेकी छन्। उनले बौद्धिक सनातन हिन्दु राष्ट्र र राजसंस्थालाई मूल राजनीतिक एजेन्डाका रूपमा अघि सारेकी छन्। देशको मौलिक पहिचान, संस्कृति र परम्पराको संरक्षण गर्दै स्थिर शासन प्रणाली आवश्यक रहेको उनको भनाइ छ।
सजिना कार्कीका अनुसार नेपाल बहुधार्मिक र बहुसांस्कृतिक देश भए पनि यसको ऐतिहासिक आधार सनातन परम्परामै रहेको छ। त्यसैले देशको पहिचान जोगाउन हिन्दु राष्ट्र र संवैधानिक राजसंस्था पुनःस्थापना आवश्यक रहेको उनको धारणा छ। उनले विचार र बहसको माध्यमबाट आफ्ना एजेन्डालाई जनतासामु स्पष्ट पार्दै समर्थन जुटाउने बताएकी छन्।
राजनीतिक एजेन्डासँगै उनले विकासका ठोस कार्यक्रम पनि अघि सारेकी छन्। विशेषगरी कृषि क्षेत्रलाई प्राथमिकतामा राख्दै ललितपुर क्षेत्र नं. १ लाई अर्गानिक उत्पादनको केन्द्र बनाउने योजना प्रस्तुत गरेकी छन्। स्थानीय किसानलाई प्रोत्साहन गर्दै अर्गानिक भिलेजको अवधारणा कार्यान्वयन गर्ने, फलफूल तथा तरकारी उत्पादनमा आत्मनिर्भर बनाउने र बजार व्यवस्थापन सुदृढ गर्ने उनको लक्ष्य छ।
कृषिसँगै पशुपालनलाई आयआर्जनको मुख्य आधार बनाउने योजना पनि उनले अघि सारेकी छन्। दूध, मासु तथा अन्य पशुजन्य उत्पादनलाई व्यवस्थित गर्दै त्यसका बाई–प्रोडक्ट उत्पादनमा जोड दिने बताएकी छन्। यसबाट स्थानीय स्तरमै रोजगारी सिर्जना हुने र युवालाई विदेश पलायन हुनबाट रोक्न सकिने उनको विश्वास छ।
पूर्वाधार विकासतर्फ उनले मोटर बाटोको स्तरोन्नति र व्यवस्थापनलाई प्राथमिकतामा राखेकी छन्। ग्रामीण बस्तीमा सहज यातायात पहुँच पुर्याउने, कच्ची सडकलाई स्तरोन्नति गर्ने र वर्षायाममा हुने सास्ती अन्त्य गर्ने योजना रहेको बताएकी छन्। यातायात व्यवस्थापन सुधार गरी बिहान–बेलुका विद्यालय जाने विद्यार्थीका लागि सुरक्षित सार्वजनिक सवारी व्यवस्था मिलाउने प्रतिबद्धता पनि जनाएकी छन्।
पर्यटन प्रवर्द्धन पनि उनको प्रमुख योजनामध्ये एक हो। ललितपुर क्षेत्र नं. १ मा रहेका प्राकृतिक र सांस्कृतिक सम्पदाको संरक्षण र प्रवर्द्धन गर्दै आन्तरिक तथा बाह्य पर्यटन बढाउने उनले बताएकी छन्। होमस्टे, धार्मिक पर्यटन र कृषि पर्यटनको सम्भावना उपयोग गर्ने योजना रहेको उनको भनाइ छ।
स्वास्थ्य क्षेत्र सुधारका लागि प्रत्येक वडामा आधारभूत स्वास्थ्य सेवा प्रभावकारी बनाउने र आवश्यक स्थानमा बर्थिङ सेन्टर स्थापना गर्ने योजना प्रस्तुत गरेकी छन्। ग्रामीण महिलालाई सुरक्षित सुत्केरी सेवा उपलब्ध गराउने, स्वास्थ्यकर्मीको व्यवस्थापन गर्ने र औषधि आपूर्ति नियमित बनाउने प्रतिबद्धता उनले व्यक्त गरेकी छन्।
शिक्षा क्षेत्रमा गुणस्तरीय शिक्षासँगै व्यावहारिक सीपमूलक कार्यक्रम सञ्चालन गर्ने उनको योजना छ। विद्यालयमा बिहान–बेलुका यातायात सुविधा उपलब्ध गराई विद्यार्थीको नियमित उपस्थिति सुनिश्चित गर्ने लक्ष्य राखिएको छ। साथै, प्राविधिक तथा कृषि शिक्षालाई जोड दिँदै स्थानीय आवश्यकता अनुसारको पाठ्यक्रम विकासमा पहल गर्ने उनले बताएकी छन्।
सजिना कार्कीले आफ्नो उम्मेदवारी केवल राजनीतिक परिवर्तनका लागि मात्र नभई सामाजिक र आर्थिक रूपान्तरणका लागि भएको दाबी गरेकी छन्। सनातन मूल्य, स्थानीय उत्पादन, पूर्वाधार विकास, स्वास्थ्य र शिक्षालाई सन्तुलित रूपमा अघि बढाएर ललितपुर क्षेत्र नं. १ लाई नमूना क्षेत्र बनाउने उनको प्रतिबद्धता छ। चुनावी मैदानमा उनी आफ्ना एजेन्डा र योजनासहित मतदातामाझ सक्रिय रूपमा पुगिरहेकी छन्।
