बागमती प्रदेशको छैठौँ मुख्यमन्त्रीका रुपमा मंगलबार सपथ ग्रहण गरेका ईन्द्रबहादुर बानियाँ बिगत ३७ वर्षदेखि नेपाली राजनीतिमा क्रियाशील व्यक्तित्व हुन् । मकवानपुरको हेटौँडा–१८ (तत्कालीन हर्नामाडी गाविस–४ मा जन्मिएका ५५ वर्षीय बानियाँले नेपाल विद्यार्थी संघबाट राजनीति सुरु गरेका हुन् ।
पिता क्षेमबहादुर बानियाँ र माता प्रेमकुमारी बानियाँको कोखबाट २०२७ साल भदौमा उनको जन्म भएको हो । आइ.कम.सम्मको औपचारिक शिक्षा हासिल गरेका बानियाँले २०४६ सालमा नेपाल विद्यार्थी संघको मकवानपुर बहुमुखी क्याम्पस उपसभापति पदमा रहेर सांगठनिक जिम्मेवारी निर्वाह गर्न सुरु गरेका थिए । काँग्रेस राजनीतिमा अघि बढ्ने क्रममा २०५१ सालमा उनी काँग्रेस महाधिवेशन प्रतिनिधि भए । २०५२ सालमा नेपाल विद्यार्थी संघ, मकवानपुर जिल्लाको सहसचिवको जिम्मेवारी सम्हाले ।
विद्यार्थी जीवन सकिएपछि तरुण दलमार्फत राजनीति गरेका बानियाँ २०५५ सालमा नेपाली काँग्रेसको भातृ संस्था नेपाल तरुण दल, मकवानपुर जिल्ला सचिवको जिम्मेवारीमा रहे । उनले २०५६ सालमा नेपाल तरुण दल, मकवानपुरको नेतृत्वसमेत सम्हाले । २०५६ सालदेखि निरन्तर पार्टी महासमिति सदस्यको भूमिका उनी रहेका छन् ।
बानियाँ २०५८ सालमा नेपाली कांग्रेस मकवानपुर जिल्ला सदस्यको भूमिकामा रहे । पार्टी राजनीतिसँगै जनप्रतिनिधिको रुपमा निर्वाचित हुन पार्टीले पठाएसँगै उनी २०६४ सालमा संविधानसभा सदस्यमा प्रत्यक्षतर्फको उम्मेदवार बने । त्यतिबेला उनी निर्वाचनमा पराजित भए । उनी पुनः दोस्रो पटक २०७० मंसिर ४ गते मकवानपुर क्षेत्र नम्बर १ बाट प्रत्यक्षतर्फका संविधानसभा सदस्य निर्वाचित भए ।
पार्टी राजनीति पनि सँगसँगै अघि बढाएका बानियाँले झण्डै ५ वर्ष नेपाली काँग्रेस मकवानपुरको नेतृत्व गरे । उनी २०७२ माघ २५ देखि २०७८ मंसिरसम्म नेपाली कांग्रेस मकवानपुरको सभापतिको भूमिकामा काम गरे । संविधानसभा सदस्य रहेकै बेला २०७३ मंसिर १५ गते उनी नेपाल सरकारको संस्कृति पर्यटन तथा नागरिक उड्ययन राज्यमन्त्रीमा नियुक्त भए । त्यस्तै २०७३ फागुन ३० गते नेपाल सरकारको गृह राज्यमन्त्रीमा नियुक्त भई काम गरेका थिए ।
२०७४ मंसिर २१ गते भएको निर्वाचनमा मकवानपुर प्रतिनिधिसभा क्षेत्र नं. २ को (ख) बाट बानियाँ भारी मतान्तरले प्रदेशसभा सदस्यमा निर्वाचित बनेका थिए । २०७४ पुस ३ गते उनी सर्वसम्मत रुपमा नेपाली कांग्रेस बागमती प्रदेश संसदीय दलका नेतामा पनि चुनिएका थिए ।
२०७८ मंसिर २० गते भएको नेपाली कांग्रेस बागमती प्रदेशको निर्वाचनबाट बानियाँलाई प्रदेश सभापतिको जिम्मेवारीमा पु¥यायो । हालसम्म पनि उनी सोही भूमिकामा रहेका छन् ।
२०७९ मंसिर ७ गते भएको अर्को निर्वाचनमा पनि बानियाँ पुनः प्रदेशससभा सदस्य निर्वाचित भए । २०७९ को निर्वाचनपछि नेपाली काँग्रेस प्रदेश संसदीय दलको नेताका लागि बानियाँ पुनः अग्रसर बनेता पनि त्यतिबेला भने प्रतिस्पर्धी बहादुरसिंह लामासँग उनी पराजित भए । दलको नेता बनेसँगै २०८१ मा लामा प्रदेशको मुख्यमन्त्री बने । त्यसको १ वर्षपछि लामामाथि अविश्वास पैदा भई बानियाँसहितका बहुमत सांसदहरुले नेपाली काँग्रेस संसदीय दलको नेता परिवर्तनका लागि अविश्वासको प्रस्ताव दर्ता गराए । प्रस्ताव स्वीकृत भई २०८२ साउन १४ गते भएको काँग्रेस संसदीय दलको नेताको निर्वाचनमा बानियाँले प्रतिस्पर्धी लामालाई पराजित गरे । काँग्रेसका ३७ सांसदमध्ये बानियाँको पक्षमा २१ र लामाको पक्षमा १५ मत खसेको थियो । एक मत भने बदर भएको थियो ।
दलको नेतामा पराजित भएपछि मुख्यमन्त्री बहादुरसिंह लामाले २०८२ साउन १८ गते राजीनामा दिएका थिए । त्यसलगतै एमाले र काँग्रेसका बहुमत सांसदहरुले बानियाँलाई मुख्यमन्त्रीका रुपमा अघि सारेका हुन् । प्रदेश प्रमुख देवकोटाले साउन २० गते मंगलबार बागमती प्रदेशको मुख्यमन्त्री नियुक्त गर्दै बानियाँलाई सपथ ग्रहणसमेत गराएका छन् ।
Anirudrakhabar बाट...
