ललितपुर - खानीखोला हाइड्रोपावर कम्पनी लिमिटेडले हकप्रद शेयर निष्कासन तथा बिक्री खुला गरेको जानकारी दिएको छ। कम्पनीले गत आर्थिक वर्षको साधारण सभा तथा नियामक निकायको स्वीकृति अनुसार हकप्रद शेयर बिक्री खुला गरेको हो।
कम्पनीले प्रतिकित्ता रू. १०० अंकित मूल्यका दरले १ (एक) कित्ता सेयर बराबर १ (एक) कित्ता दिने गरी हाल कायम रहेको सेयरधनीहरुलाई हकप्रद शेयर जारी गरेको छ। यस अनुसार कुल ४५,५४,१४७ कित्ता हकप्रद शेयर निष्कासन गरी बिक्री खुला गरिएको कम्पनीले जनाएको छ।
शेयरधनीहरूले हकप्रद शेयरको आवेदन आज मिति २०८२ साल भदौ २ गतेदेखि २०८२ साल भदौ २३ गतेसम्म गर्न सक्नेछन्। आवेदन सीडीएस एण्ड क्लियरिङ्ग लिमिटेडको प्रणालीमार्फत निर्मित 'मेरो शेयर' प्रयोग गरी सी–आस्वा (CASBA) प्रणालीबाट गर्न सकिनेछ।
कम्पनीका अनुसार आवश्यक पर्ने कागजातसहित तोकिएका स्थानहरूमा सम्पर्क गरी पनि आवेदन दिन सकिने व्यवस्था मिलाइएको छ। यसका लागि कम्पनीले निम्न चार स्थान तोकेको छः
१) सिटिजन्स क्यापिटल लिमिटेड, कमलादी, काठमाडौं
२) श्री सिटिजन्स बैंक इन्टरनेसनल लिमिटेडका विभिन्न शाखाहरू
३) खानी खोला हाइड्रोपावर कम्पनी लिमिटेडको कार्यालय, धुवाँधार, काममाङ्डो
४) अन्य तोकिएका बैंक तथा वित्तीय संस्थाहरू (ASBA सुविधा उपलब्ध हुने)।
हकप्रद शेयर सम्बन्धी थप विवरण सिटिजन्स क्यापिटल लिमिटेडको वेबसाइट www.citizenscapital.com वा खानी खोला हाइड्रोपावर कम्पनी लिमिटेडको वेबसाइट www.kkhpcl.com.np मार्फत हेर्न सकिनेछ।
आवेदन अवधि सकिएपछि बाँकी रहने हकप्रद शेयरहरू बिक्री गर्ने प्रक्रिया समेत कम्पनीले तय गर्नेछ। सेयर निष्कासन तथा बिक्री प्रबन्धक सिटिजन्स क्यापिटल लिमिटेड रहेको कम्पनीले जनाएको छ।
यसअघि कम्पनीले सेयरधनीहरुलाई सूचना प्रकाशित गर्दै तोकिएको मितिभित्र हकप्रद शेयरमा आवेदन दिन अनुरोध गरेको छ।
